خزوا العراق... وباكوا فلوسه // بقلم الأستاذ الأديب الشاعر نجاح ناجي اللوزه

( خزوا العراق... وباكوا فلوسه )

أويلي عل العراق الغالي دمروا
يا وسفه عليه شلون فرهدتوا
مو كافي الشعب بالقهر موتوا
من عادل زويه وأبن حلبوسه
   خزوا العراق ... وباكو فلوسه
--------------------------------------
التنتخبه تريده عون للكلفات
تشكيل الحكومه صار بالآهات
تنباع المناصب كلها بالشدات
وأحوال البلاد بحاله ميئوسه
    خزوا للعراق ... وباكوا فلوسه
------------------------------------
لا تعيين عدنا ولا عمل للناس
وخيرات البلد للشعب بالقياس
خليتوا الشعب بالفكر والإفلاس
وقاصات البلد أصبحت مكنوسه
     خزوا العراق ... وباكو فلوسه
----------------------------------
ثلثين الشعب بالدول هججتوا
و الباقي إبلدنا إنتوا هجرتوا
يا خير الإجانه وإنتوا سويتوا
بس ضيم وقهر وبحاله ميئوسه
    خزوا للعراق ... وباكوا فلوسه
----------------------------------
شرد أحجي وأسولف والكلب مهموم
وضعنا بهل البلد يا ناس ما مفهوم
بس السرسريه تنصبت هل اليوم
شيهمه الفقير ... جيوبه متروسه
خزوا للعراق ... وباكوا فلوسه
----------------------------------
سبعه تلفت من الماي مليارات
ما تقنع شعبنا هاي الكلاوات
كل يوم اليمر علينه بس أزمات
بسم الدين هاي الناس معلوسه
     خزوا للعراق ... وباكوا فلوسه
---------------------------------
إنهض ياشعبنا ورجع الأمجاد
وطرد كل عميل وإسحك الأوغاد
خ نصفي كلبنا ونترك الأحقاد
وبرأس النشامه الغيره مغروسه
     خزوا للعراق ... وباكوا فلوسه
----------------------------------